Концептот BMW R20, кој првпат беше претставен кон крајот на 2024 година на настанот Villa d'Este, е сè поблиску до својата сериска верзија. Новите видео материјали објавени од BMW Motorrad откриваат низа технички и естетски измени кои укажуваат на подготовка за премиерата.
Мотоциклот, кој е замислен како спој меѓу „super naked“ и „power cruiser“ категориите, во најновото видео „The Ones Who Ride | EP.01.VISION“ покажува дека го задржува својот препознатлив мускулест изглед, но со компоненти прилагодени за хомологација и сериско производство.
Технички измени за сериска примена
Најзначајните промени се забележуваат кај издувниот систем и доводот на воздух. Оригиналниот концепт користеше систем со директни цевки и големи мегафонски придушувачи, кои сега се заменети со „underslung“ издув. Овој нов систем вклучува голем колектор, во кој најверојатно е сместен катализаторот. Дополнително, големите влезни труби за воздух од концептот се отстранети, а на нивно место е поставена стандардна кутија за филтерот за воздух сместена под седиштето.
BMW R20 коцепт
Измени претрпе и системот за сопирање. Наместо CNC машински обработените шест-клипни клешти, мотоциклот прикажан во видеото користи поконвенционални четириклипни клешти со брендирање на BMW. Ознаките укажуваат дека ваквото решение би можело да се најде и на серискиот модел.
Зачуван карактер и очекувања
И покрај техничките прилагодувања, клучните визуелни елементи што го дефинираат овој „muscle bike“ остануваат непроменети. Дизајнот на задната вилушка, предниот фар, резервоарот за гориво и краткото меѓуоскино растојание се задржани, со што се одржува оригиналната силуета прикажана на Villa d'Este.
Системот за кочење на концептот R20
Повеќе детали за мотоциклот што во видеото го вози извршниот директор на BMW Motorrad, Маркус Флаш, како и потенцијалниот датум на лансирање, се очекува да бидат обелоденети на саемот EICMA подоцна оваа година.
Коментари