Yamaha ја разбранува мото-јавноста со мистериозна најава за претстојниот саем EICMA 2026, ветувајќи дека ќе го „редефинира стандардот“. Компанијата закажа официјално претставување на новитетот за 2. ноември во Милано, само еден ден пред официјалното отворање на саемот, без притоа да открие конкретен модел, сегмент или технички спецификации. Иако до саемот има уште околу два и пол месеци, овој раниот тајминг за најава е невообичаен, што дополнително ја зголемува неизвесноста.
Промотивниот материјал содржи графички приказ што наликува на ЕКГ-крива со три нерамномерни отчукувања, придружен со пораката: „Индустријата предолго го следи истиот ритам. Ние сме подготвени да го предизвикаме. Доаѓа нешто ново“. Оваа порака, заедно со визуелниот приказ, веднаш ги поттикна шпекулациите за нов агрегат со три цилиндри кој би можел да воведе поинаква динамика на возење.
Што открива графичкиот приказ и зошто се споменува „ритам“?
Клучниот елемент во најавата е графиконот кој асоцира на срцев ритам, каде што трите врвови не се рамномерно распоредени, особено со поголемиот јаз меѓу вториот и третиот отчукување. Во светот на мотоциклите, „ритам“ најчесто се однесува на редоследот на палење на цилиндрите. Актуелниот CP3 агрегат на Yamaha, кој се вградува во моделите како MT-09, Tracer 9, XSR900 и YZF-R9, користи коленесто вратило со поместување од 120 степени, што резултира со рамномерен редослед на палење од 240-240-240 степени. Овој мотор, кој дебитираше во 2014 година во MT-09 со 847 кубика, а подоцна порасна на 890 кубика, има карактеристика која не се совпаѓа со графикот, што укажува дека Yamaha веројатно не само што ќе го вгради постоечкиот мотор во нова шасија, туку подготвува нешто со поинаква техничка природа.
Yamaha XSR900 GP е еден од постоечките модели со CP3 трицилиндричен агрегат. Моделот најавен за 2. ноември сè уште не е прикажан.
Инспирација од Triumph и прашањето за Ténéré 900
Нерамномерните интервали во графикот потсетуваат на пристапот на Triumph со нивниот T-Plane агрегат, кој кај моделите Tiger 900 и Tiger 1200 користи редослед на палење од 180-270-270 степени. Според Triumph, оваа конфигурација го подобрува одзивот на ниски вртежи и тракцијата на терен, што е идеално за авантуристички мотоцикли. Токму затоа, најгласни се шпекулациите за долгоочекуваната Ténéré 900, која би ја пополнила празнината во понудата на Yamaha помеѓу двоцилиндричната Ténéré 700 и поголемите модели. Сепак, постои и скептицизам: ако Yamaha само го копира пристапот на Triumph, тврдењето за „редефинирање на стандардот“ би можело да звучи празно, па не е исклучено ова да е чисто маркетинг-најава за нешто фундаментално различно.
Triumph Tiger 900 користи T-Plane трицилиндричен мотор со нерамномерен редослед на палење од 180-270-270 степени.
Други можни сценарија и иднината на Naked моделите
Покрај авантуристичкиот модел, се разгледуваат и други опции. Можно е да се работи за помал трицилиндричен агрегат од околу 500 кубика, или пак за неконвенционален распоред на цилиндрите, сличен на V3 концептот на Honda, каде првиот и третиот цилиндар се навалени нанапред, а вториот наназад под агол од 75 степени. Трета можност се однесува на терминот „standard“, кој во американскиот англиски јазик означува naked мотоцикл. Со оглед на тоа што MT-10 веќе не е дел од европската понуда, Yamaha би можела да се врати со напреден naked модел. Потсетуваме дека во 2020 година Yamaha експериментираше со компресорски трицилиндричен мотор, а подоцна поднесе и патент за електрично потпомогнат турбополнач, што би било вистинско редефинирање на стандардите.
Yamaha Ténéré 700 Explore е постоечкиот двоцилиндричен модел од серијата – Ténéré 900 сè уште не е официјално потврдена.
Нашиот тим ќе биде присутен на саемот EICMA во Милано од каде ќе известуваме за сите новитети. Следете нè.
MT-09 (овде како специјална изведба Cyber Rally) е основен модел за CP3 трицилиндричниот агрегат на Yamaha од 2014 година.
Коментари