MotoGP пазарот за 2027 е практично решен зад затворени врати – но официјални објави речиси и да нема.
Единствено Aprilia го потврди продолжувањето на Марко Безеки, додека сите други трансфери се стопирани. Причината не е случајна: производителите и MotoGP Sports Entertainment (поранешна Dorna) сè уште го немаат финализирано новиот комерцијален договор за периодот 2027–2031.
Причината за тишината околу трансферите не е мистерија, туку резултат на комплексни и сè уште нерешени преговори меѓу производителите (MSMA) и MotoGP Sports Entertainment. Се работи за новиот комерцијален договор за периодот 2027–2031, документ кој ги дефинира финансиските распределби, обврските и правата на производителите во шампионатот.
Според Motorsport.com, преговорите се заглавени главно поради финансиски разлики, односно тоа колку пари ќе добиваат производителите од комерцијалните права и под кои услови ќе продолжат да се натпреваруваат .
MotoGPNews дополнително потврдува дека MSMA уште пред речиси една година договорила стратегија на „колективна тишина“ – ниту еден производител да не објавува трансфери додека не се потпише новиот договор. Причината е едноставна: никој тим формално нема гаранција дека ќе биде дел од шампионатот по 2026, па затоа не сакаат да објавуваат возачи за сезоната за која правно сè уште не постојат.
Cycle News открива уште една важна точка: од Liberty Media, производителите бараат поголем процент од приходите, наместо фиксна годишна сума како досега. Тоа е главниот извор на тензија – MotoGP сака поголеми инвестиции во промоција, додека производителите бараат подобра финансиска распределба пред да се обврзат за нови пет години.
Додека овие преговори не завршат, тимовите ги користат необјавените трансфери како преговарачки адут. Според извештаите, неколку соопштенија се веќе подготвени, но намерно се задржани – буквално „во фиока“ – сè додека не се постигне договор.
Кои трансфери се веќе договорени – но не се објавени?
Иако официјално молчат, во падокот веќе се знае како ќе изгледа поголемиот дел од гридот во 2027. Еве ги најголемите „јавни тајни“:
Ducati Lenovo Team (фабрички тим)
-
Марк Маркез – останува во Ducati (договор постигнат, чека објава)
-
Педро Акоста – доаѓа од KTM и ќе го замени Бањаја (договорен трансфер, чека објава)
Aprilia Racing
-
Марко Безеки – потврден (единствен официјално објавен трансфер)
-
Франческо Бањаја – доаѓа во Aprilia (договорено, но неофицијално) – ќе вози заедно со Безеки, создавајќи целосно италијанска постава.
Yamaha Factory Racing
-
Хорхе Мартин – потпишан (необјавено)
-
Аи Огура – нов возач за 2027, доаѓа од Trackhouse Aprilia и го заменува Алекс Ринс
Honda HRC
-
Фабио Квартараро – потврден трансфер од Yamaha (неофицијално, но сигурно)
-
Давид Алонсо – се очекува да биде новиот HRC возач (само објава недостига)
KTM Factory Team
-
Алекс Маркез – преминува во фабричкиот тим по успешниот период со Ducati/Gresini
-
Маверик Вињалес – промовиран од Tech3 (договорено, чека објава)
Gresini Ducati
-
Енеа Бастианини – се враќа во Gresini (многу веројатно, договорено)
-
Дани Холгадо – нов возач од Moto2 (договорено)
Други шпекулации и можни трансфери
-
Николо Булега – потенцијален премин од WSBK во MotoGP, но без слободно место во Ducati.
-
Сена Агиус и Бери Балтус – најверојатни Moto2 возачи што би добиле шанса во MotoGP.
- Фабио Ди Џанантонио е најновото „жешко име“ на трансфер-пазарот. Негов приоритет останува да продолжи во VR46, но само доколку добие фабрички Ducati пакет – услов што моментално е тешко остварлив. Поради тоа, неколку тимови веќе се активираа: KTM и Trackhouse Aprilia сериозно го следат, додека HRC и Pramac се заинтересирани за исходот. Диџа станува еден од клучните играчи во последната фаза од пазарот, а неговиот избор може да предизвика домино‑ефект низ целиот грид.
MotoGP пазарот за 2027 е во добар дел завршен – но официјално „замрзнат“. Додека MSMA и MotoGP Sports Entertainment не го потпишат новиот комерцијален договор, тимовите ќе продолжат со стратегијата на тишина.
Во меѓувреме, падокот врие од договори што сите ги знаат, но никој не смее да ги објави.
Коментари