„Очигледно е дека не беше негова вина што излезе од патеката. Но исто така тој не смее да се стекне со предност“ – Мајк Веб, директор на трката.
MotoGP директорот на трката, Мајк Веб, објасни зошто Валентино Роси доби казна од 0.3 секунди на трката во Остин.
При еден обид на Зарко да го претекне Роси, Италијанецот на кратко излезе од патеката. Тој успеа да го задржи третото место но ја зголеми предноста пред Зарко и му се доближи на Марк Маркез кој беше пред него.
Но она што е најважно, откако се врати на патеката, Роси не ја намали брзината и ја задржа предноста пред своите конкуренти.
Директорот на трката, Мајк Веб, изјави: „Не можеш да стекнеш предност ако излезеш од патеката. Очигледно е дека се стекна со предност бидејќи му се доближи на Маркез. Затоа ја намаливме таа предност.“
„Но од друга страна, Роси не излезе намерно од патеката. Тој беше оттурнат од друг возач. Доколку намерно го направеше тоа, казната ќе беше поголема. Во овој случај беше јасно дека не излета намерно. Но исто така не ја намали и предноста која ја доби.“
„На сите им беше јасно, вклучувајќи го и Роси, дека стекна предност. Исправно ќе беше ако ја намалеше брзината и ја вратеше истата разлика што ја имаше претходно. Подоцна во текот на трката, истото му се случи и на Лоренцо но тој не стекна предност и поради тоа не реагиравме.“
„За да бидеме фер кон сите возачи, откако ќе ја видиме предноста која ја добиваат, без разлика на причината, мораме да ја одземеме таа предност. Нормална казна е возачот да се врати едно место назад. Но не постапивме така бидејќи немаше никаква намера од страна на Роси.“
Казната, која беше изречена на крајот на трката, ќе имаше некаков ефект само доколку Роси имаше предност од 0.3 секунди пред другиот возач. Но на крајот Роси заврши со предност од 2 секунди во однос на Дани Педроса.
„Казната (0.3 секунди) можеби ви делува смешно, но причината поради која чекав за да ја одобрам е бидејќи чекав потврда за да ја видам разликата која се направи. Доколку ја намалеше брзината немаше да има казна. Но тој не го направи тоа.“
После трката Роси изјави дека казната од 0.3 секунди е во ред. За него проблемот не се директорите на трката туку Зарко.
38 годишниот возач сега е лидер во генералниот пласман и има шест поени предност пред тимскиот колега Маверик Вињалес кој излета на почетокот на трката.
